Түркістан облысында отандық кәсіпкерлікті дамытуға бағытталған халықаралық аграрлық жоба жүзеге асырылуда

Түркістан облысының Бәйдібек ауданында отандық кәсіпкерлікті дамыту, ішкі нарықтағы өндірістік әлеуетті арттыру және ауыл шаруашылығы саласындағы бәсекелестікті күшейтуге бағытталған халықаралық жоба жүзеге асырылуда. Ақбастау ауылындағы «Baidibek Agro» шаруа қожалығында қолға алынған бастама халықаралық тәжірибені жергілікті өндіріске енгізу арқылы сүтті мал шаруашылығының тиімділігін арттыруды көздейді.

Жобаның басты ерекшелігі – кәсіпкерлік субъектісіне шетелдік маманды тікелей өндіріс орнына шақырып, тәжірибесін іс жүзінде қолдану мүмкіндігінің берілуі. Осы мақсатта Түркістан облысына Senior Experten Service (SES) халықаралық бағдарламасы арқылы Германия Федеративтік Республикасынан жоғары білікті аграрлық сарапшы Йозеф Фёгеле шақырылды.

Халықаралық сарапшының келуі – өңір кәсіпкерлерінің шетелдік озық тәжірибеге қол жеткізуіне ғана емес, оны жергілікті жағдайға бейімдеп, нақты өндірістік нәтижеге айналдыруға мүмкіндік береді. Бұл өз кезегінде отандық кәсіпорындардың өнімділігін арттырып, ішкі нарықты сапалы ауыл шаруашылығы өнімдерімен қамтамасыз етуге және бәсекеге қабілеттілікті күшейтуге ықпал етеді.

Жобаны жүзеге асыруда «TÚRKISTAN» кәсіпкерлерге қызмет көрсету орталығы маңызды үйлестіруші қызмет атқарып отыр. Мекеме директоры Берік Кенжебаевтың айтуынша, орталық тарапынан SES халықаралық ұйымымен байланыс орнату, қажетті құжаттарды рәсімдеу, шетелдік сарапшыны шақыру және жобаны ұйымдастыру бойынша кешенді жұмыстар жүргізілген.

Мұндай қолдау өңірдегі кәсіпкерлер үшін халықаралық ынтымақтастықтың жаңа мүмкіндіктерін ашып отыр. Мемлекеттік және кәсіпкерлік институттардың осындай өзара іс-қимылы жергілікті бизнестің дамуына жағдай жасап қана қоймай, өндіріс мәдениетін жетілдіруге, технологиялық жаңғыртуға және жаңа нарықтарға шығуға негіз қалыптастырады.

«Baidibek Agro» шаруа қожалығы – ауыл шаруашылығы саласында бірнеше бағытта жұмыс істейтін кәсіпкерлік субъектілерінің бірі. Шаруашылықтың негізгі қызметіне сүтті бағыттағы ірі қара мал өсіру, мал бордақылау, егін шаруашылығы, дәнді және дәнді-бұршақты дақылдарды өндіру кіреді. Кәсіпорын заманауи агротехнологияларды пайдалана отырып, өндіріс тиімділігін арттыруға және өңірдің агроөнеркәсіптік әлеуетін дамытуға үлес қосып келеді.

SES бағдарламасы аясындағы жұмыстың негізгі бағыты – шаруашылықтың өндірістік көрсеткіштерін арттыру. Атап айтқанда, халықаралық сарапшының тәжірибесі арқылы сүтті бағыттағы малдың өнімділігін көтеру, азықтандыру жүйесін жетілдіру, табынның генетикалық әлеуетін тиімді пайдалану және жемшөп қорын ғылыми негізде ұйымдастыру көзделген.

Сонымен бірге өндірістік шығындарды төмендету, еңбек ресурстарын тиімді басқару, сүт сапасын арттыру және өнім көлемін ұлғайту мәселелеріне басымдық берілмек. Бұл шаралардың барлығы шаруашылықтың экономикалық тиімділігін күшейтіп, ішкі нарықтағы отандық өнімнің үлесін арттыруға мүмкіндік береді.

Германиядан келген сарапшы Йозеф Фёгеле Алишер Ахметов басқаратын шаруашылықтың өндірістік үдерістерімен танысып, мамандармен алғашқы жұмыс кездесулерін өткізді. Алдағы екі апта ішінде ол кәсіпорын қызметкерлерімен бірлесіп, сүтті мал шаруашылығын тиімді ұйымдастыру, мал азығын басқару, ферма менеджменті және өндірістік көрсеткіштерді жақсарту бағытында практикалық ұсынымдар береді.

Мұнда халықаралық тәжірибені жай ғана қабылдау емес, оны жергілікті кәсіпорынның нақты жағдайына бейімдеу маңызды. Себебі ауыл шаруашылығындағы тұрақты даму өндіріс көлемін ұлғайтумен қатар, өзіндік құнды төмендету, өнім сапасын көтеру және ресурстарды тиімді пайдаланумен тікелей байланысты.

Жобаның нәтижесінде «Baidibek Agro» шаруашылығында басқару мен өндіріс тәсілдерін жетілдіру арқылы еңбек өнімділігін арттыру, мал басының өнімділігін көтеру және шығындарды оңтайландыру жоспарланып отыр. Бұл кәсіпорынның ішкі нарықтағы бәсекелік позициясын нығайтып, отандық ауыл шаруашылығы өнімдерін өндіру көлемін арттыруға септігін тигізеді.

Жалпы, Түркістан облысында жүзеге асып жатқан бұл бастама халықаралық сараптаманы отандық кәсіпкерлікті қолдау тетіктерімен ұштастырудың тиімді үлгісі болып отыр. Шетелдік тәжірибені жергілікті өндірістің ерекшелігіне бейімдеу арқылы кәсіпорындардың технологиялық және басқарушылық әлеуетін күшейтуге болады.

Мұндай жобалардың көбеюі өңірдегі шағын және орта бизнестің дамуына, ауыл шаруашылығы кәсіпорындарының бәсекеге қабілеттілігін арттыруға, ішкі нарықты отандық өніммен қамтамасыз етуге және агроөнеркәсіп кешеніндегі бәсекелестікті дамытуға оң әсер етеді. Нәтижесінде Түркістан облысының аграрлық секторы жаңа технологиялар мен халықаралық тәжірибені тиімді пайдалана отырып, тұрақты әрі бәсекеге қабілетті өндіріс моделіне қадам басады.