Түркістандық сүт өндірушілер ішкі нарықты қамтып, экспортқа бет бұрды

Түркістан облысында отандық кәсіпкерлікті дамыту, өңдеу өнеркәсібін кеңейту және жергілікті өнімнің бәсекеге қабілеттілігін арттыру бағытындағы жұмыстар жүйелі түрде жалғасып келеді. Әсіресе азық-түлік өндірісін дамыту, ішкі нарықты отандық тауарлармен қамтамасыз ету және кәсіпкерлерге қолайлы жағдай жасау өңір экономикасының маңызды бағыттарының біріне айналды. Бұл ретте сүт өнімдерін өндіретін кәсіпорындардың өндірістік қуатын арттыруы өңірдің азық-түлік қауіпсіздігін нығайтып қана қоймай, жергілікті бизнестің жаңа нарықтарға шығуына мүмкіндік беруде.

Түркістан қаласында жұмыс істеп тұрған «Milkart» кәсіпорны – осы бағыттағы нақты жобалардың бірі. Заманауи технологиямен жабдықталған өндіріс орны 2024 жылы іске қосылған. Түркиядан жеткізілген құрал-жабдықтар арқылы кәсіпорында сүтті өңдеудің заманауи технологиялары енгізіліп, табиғи шикізаттан түрлі өнімдер өндіру жолға қойылған.

Бүгінде өндіріс орнында тәулігіне ондаған тонна сүт өңделіп, 48 түрлі өнім шығарылады. Өнім түрлерінің қатарында сүт, айран, қаймақ, сүзбе, сарымай және басқа да күнделікті тұтынуға қажетті тауарлар бар. Кәсіпорын өнімдері ең алдымен Түркістан және Кентау қалаларының ішкі нарығына бағытталған. Сонымен қатар әлеуметтік дүкендерге, сауда орындарындағы арнайы әлеуметтік бұрыштарға және ауыл шаруашылығы жәрмеңкелеріне тұрақты жеткізіліп келеді.

Бұл – жергілікті кәсіпкерліктің ішкі нарықтағы үлесін арттырудың маңызды көрсеткіші. Отандық өндірістің дамуы тұтынушылар үшін өнім таңдау мүмкіндігін көбейтіп, нарықтағы бәсекелестікті күшейтеді. Ал бәсекелестіктің артуы кәсіпкерлерді өнім сапасын жақсартуға, өндіріс шығындарын оңтайландыруға, жаңа технологияларды енгізуге және баға саясатын тиімді қалыптастыруға ынталандырады.

Әлеуметтік маңызы бар азық-түлік өнімдерінің бағасын тұрақтандыру бағытында кәсіпорын мемлекеттік қолдау тетіктерін де пайдаланып отыр. Атап айтқанда, «Түркістан» әлеуметтік-кәсіпкерлік корпорациясы» АҚ арқылы жеңілдетілген несие алып, өндірістік қызметін дамытуға мүмкіндік алған. Бұл қаржы кәсіпорынның тұрақты жұмыс істеуіне, өнім көлемін арттыруына және халықты әлеуметтік маңызы бар сүт өнімдерімен белгіленген бағалар бойынша қамтамасыз етуіне ықпал етуде.

Мұндай қолдау шаралары өңірдегі кәсіпкерлікті дамытудың тиімді құралдарының бірі саналады. Мемлекеттік институттар мен жеке бизнестің өзара іс-қимылы нәтижесінде өндірістік жобалар жүзеге асып, жергілікті өнім көлемі артады. Бұл ретте мемлекеттік-жекешелік әріптестік қағидаттарын өндіріс, логистика, инфрақұрылым және әлеуметтік маңызы бар жобаларға кеңінен енгізу кәсіпкерлік белсенділікті одан әрі күшейтуге мүмкіндік береді.

Кәсіпорын өндіріс көлемін кезең-кезеңімен ұлғайтуды жоспарлап отыр. Алдағы уақытта өндірістік қуатты төрт есеге дейін арттыру, жаңа технологияларды енгізу және өнім түрлерін көбейту көзделген. Өндірістің кеңеюі ішкі нарықтағы сұранысты толық қамтамасыз етуге ғана емес, экспорттық әлеуетті арттыруға да жол ашады.

Компанияның негізгі экспорттық бағыттары ретінде Өзбекстан, Қырғызстан және Орталық Азияның басқа да нарықтары қарастырылып отыр. Сонымен бірге болашақта Қытай нарығына шығу мүмкіндігі де зерделенуде. Бұл үшін өнім сапасын халықаралық талаптарға сәйкестендіру, өндірістік қуатты арттыру, логистиканы жетілдіру және тұрақты шикізат базасын қалыптастыру маңызды.

Экспорттың өсуі кәсіпорынның өзіне ғана емес, жалпы өңір экономикасына оң әсер етеді. Біріншіден, жергілікті өндірістің көлемі ұлғаяды. Екіншіден, жаңа жұмыс орындары ашылады. Үшіншіден, салық түсімдері артып, өңірдің экономикалық белсенділігі күшейеді. Төртіншіден, Түркістанда өндірілген тауарлардың сыртқы нарыққа шығуы «Қазақстанда жасалған» өнімдердің танымалдығын арттыруға мүмкіндік береді.

Қазіргі таңда кәсіпорында 13 жергілікті тұрғын тұрақты жұмыспен қамтылған. Оның сегізі өндірістік цехта еңбек етсе, бес қызметкер дайын өнімді сауда орындарына жеткізу жұмыстарын атқарады. Өндірістік қуаттың кеңеюіне қарай жұмыс орындарының саны да артады деп күтілуде. Бұл өз кезегінде жергілікті халықтың жұмыспен қамтылуына және табысының өсуіне ықпал етеді.

Сүт өндірісінің дамуы ауыл шаруашылығы саласымен де тікелей байланысты. Өңірдегі мал шаруашылығы фермалары мен жеке шаруашылықтардан алынатын сүтті жергілікті кәсіпорындардың өңдеуі ауыл шаруашылығы өнімдеріне қосылған құн қалыптастыруға мүмкіндік береді. Яғни шикізаттың өңірден тыс шығарылмай, Түркістан облысының өзінде дайын өнімге айналуы экономиканың әртараптануына және өңдеу өнеркәсібінің үлесін арттыруға жағдай жасайды.

Бұл бағытта кәсіпкерлерді қаржыландырумен қатар, өндірістік инфрақұрылыммен қамтамасыз ету, инженерлік желілерге қолжетімділікті арттыру, логистикалық шығындарды төмендету және өнімді өткізу нарықтарын кеңейту маңызды. Сондай-ақ шағын және орта бизнестің ірі өндіріс орындарымен кооперациясын жолға қою жергілікті кәсіпорындардың тұрақты тапсырыстар алуына мүмкіндік береді.

Түркістан облысында кәсіпкерлікті қолдауға бағытталған шаралар алдағы уақытта да жалғасын табады. Оның ішінде жеңілдетілген қаржыландыру, инвестициялық жобаларды сүйемелдеу, өндірістік инфрақұрылым тарту, отандық өнім өндірушілерге қолдау көрсету және экспорттаушылардың нарыққа шығуына жағдай жасау негізгі басымдықтардың қатарында.

Осы тұрғыдан алғанда, «Milkart» кәсіпорнының дамуы Түркістандағы отандық кәсіпкерліктің нақты нәтижесін көрсетеді. Ішкі нарықты сапалы өніммен қамтамасыз етіп отырған өндіріс орнының алдағы уақытта экспортқа шығуы өңірдің сауда-экономикалық байланыстарын кеңейтуге мүмкіндік береді. Жергілікті шикізатты терең өңдеп, бәсекеге қабілетті дайын өнім шығару – Түркістан облысының экономикалық өзін-өзі қамтамасыз етуін күшейтіп, жаңа өндірістердің қалыптасуына және тұрақты жұмыс орындарының көбеюіне негіз болады.

Бәсекеге қабілетті кәсіпкерлік орта қалыптасып, мемлекеттік қолдау мен жеке инвестиция тиімді ұштасқан жағдайда өңірде жаңа өндіріс орындарының саны артып, ішкі нарықтағы отандық өнімнің үлесі көбейеді. Бұл өз кезегінде Түркістан облысының тұрақты әлеуметтік-экономикалық дамуына, халықтың әл-ауқатын арттыруға және өңірдің экспорттық әлеуетін күшейтуге серпін береді.