Түркістан облысы бүгінде еліміздегі экономикалық өсім мен кәсіпкерлікті дамыту бағытында қарқынды дамып келе жатқан өңірлердің біріне айналды. Әсіресе соңғы жылдары туризм саласының қарқынды дамуы отандық кәсіпкерліктің өркендеуіне үлкен серпін беруде. Өңірде жаңа қонақүйлер, демалыс орындары, қоғамдық тамақтану нысандары мен сауда орталықтары көбейіп, шағын және орта бизнестің мүмкіндігі артып келеді. Мемлекет басшысы Қасым-Жомарт Тоқаев кәсіпкерлікті қолдау мен экономиканы әртараптандыру мәселесіне ерекше көңіл бөліп келеді. Осы бағытта облыс әкімі Нұралхан Көшеров жетекшілігімен өңірде инвестиция тарту, туризмді дамыту және кәсіпкерлерге қолайлы орта қалыптастыру бағытында ауқымды жұмыстар жүргізілуде.
Соңғы жылдары Түркістан облысына келетін туристер саны тұрақты түрде артып келеді. 2025 жылдың қорытындысы бойынша облыстағы орналастыру орындарында демалғандар саны 347,6 мың адамға жетіп, өткен жылмен салыстырғанда 14,7 пайызға өсті. Туристер ағынының көбеюі қонақүй бизнесі, мейрамхана ісі, көлік қызметі, сауда және түрлі сервистік қызметтердің дамуына оң әсер етті. Нәтижесінде өңірде жаңа кәсіпкерлік нысандары ашылып, халықты тұрақты жұмыспен қамту деңгейі артып келеді.
Түркістан қаласының тарихи және рухани орталық ретінде танылуы да кәсіпкерлер үшін үлкен мүмкіндікке айналды. Әсіресе Қожа Ахмет Ясауи кесенесі маңында ұлттық қолөнер бұйымдарын өндіру, кәдесый сату, ұлттық тағамдар әзірлеу және гидтік қызмет көрсету бағытындағы бизнес қарқынды дамуда. Бүгінде жергілікті кәсіпкерлер ұлттық нақыштағы өнімдерді туристерге ұсынып, қазақ мәдениетін халықаралық деңгейде танытуға үлес қосып келеді. Бұл өз кезегінде ұлттық брендтің қалыптасуына жол ашуда.
Туризм саласының дамуы жастар кәсіпкерлігіне де тың серпін берді. Қазіргі таңда жастар арасында кофеханалар, этно-кафелер, сувенир дүкендері мен туристік агенттіктер ашуға қызығушылық артып отыр. Әлеуметтік желілер арқылы туристік қызмет көрсету де жаңа кәсіп түріне айналуда. Көптеген жас кәсіпкерлер экскурсия ұйымдастыру, фото және бейне қызметтер ұсыну, онлайн гид қызметін жүргізу арқылы табыс табуда.
Өңірде экотуризм бағытының дамуы ауыл кәсіпкерлеріне де жаңа мүмкіндік әкелді. Табиғи аймақтарға келушілер саны 151,9 мың адамға жетіп, ауылдық жерлердегі шағын бизнестің дамуына ықпал етті. Қазіргі таңда ауыл тұрғындары қонақ үйлер, демалыс аймақтары, этноауылдар ашып, туристерге ұлттық тағамдар мен дәстүрлі тұрмысты таныстыруда. Бұл ауыл халқының табысын арттырып қана қоймай, ішкі көші-қонның азаюына және ауыл экономикасының жандануына әсер етуде.
Сонымен қатар Түркістан облысында туризм инфрақұрылымын дамыту бағытында ірі инвестициялық жобалар жүзеге асырылуда. Жаңа қонақүйлер, ойын-сауық орталықтары, туристік кешендер мен жол инфрақұрылымының салынуы құрылыс саласындағы отандық компаниялардың жұмыс көлемін арттырды. Жергілікті құрылыс кәсіпорындары жаңа нысандарды салуға белсенді қатысып, өңір экономикасының дамуына үлес қосуда.
Туризмнің дамуы сауда саласына да оң әсер етті. Бүгінде Түркістан қаласында ұлттық стильдегі киімдер, қолөнер бұйымдары, зергерлік заттар мен дәстүрлі тағам өнімдерін сататын дүкендер саны көбейіп келеді. Әсіресе шетелдік туристер арасында қазақы нақыштағы сувенирлер мен ұлттық өнімдерге сұраныс жоғары. Бұл жергілікті кәсіпкерлер үшін тұрақты табыс көзіне айналуда.
Өңірде қоғамдық тамақтану саласы да қарқынды дамып келеді. Туристер санының артуына байланысты ұлттық тағам ұсынатын мейрамханалар мен дәмханалар көбейді. Кәсіпкерлер қазақтың дәстүрлі тағамдарын заманауи форматта ұсынып, туристердің қызығушылығын арттыруда. Бұл ұлттық гастрономиялық туризмнің дамуына да ықпал етуде.
Бұдан бөлек, Түркістан облысында кәсіпкерлерге мемлекеттік қолдау көрсету шаралары да күшейтілген. Жеңілдетілген несие беру, бизнеске арналған гранттар, инфрақұрылым жүргізу және кәсіпкерлерді оқыту бағдарламалары жүзеге асырылып келеді. Бұл көптеген азаматтардың өз кәсібін бастауына мүмкіндік беруде. Нәтижесінде өңірде шағын және орта бизнес саны артып, экономикалық белсенділік күшейіп келеді.
Түркістан бүгінде тек тарихи-рухани орталық қана емес, сонымен қатар туризм мен кәсіпкерлік қатар дамыған жаңа экономикалық аймаққа айналып келеді. Туризм саласының өркендеуі халықтың әл-ауқатын арттырып, жаңа жұмыс орындарының ашылуына және өңір экономикасының нығаюына ықпал етуде. Алдағы уақытта туризм мен кәсіпкерлікті қатар дамыту арқылы Түркістан облысы еліміздегі ең қуатты экономикалық өңірлердің біріне айналатыны анық.
